وصية الملك زعبله لابنائه

الوصية

التفت الأسرة حول فراش الزعيم وهو يلفظ أنفاسه الأخيرة...
قال الزعيم بصوت ضعيف ولكنه حازم في نفس الوقت:
زعبله: كلكم موجودين
زوجته: أيوه يا حبيبى... أنا جنبك أهه... وأدى هناء وشيرين... قمرين دول ولا عينين

زعبله: طب اسمعوا اللي حقوله كويس
هناء: سامعينك يا بابا... اتكلم
زعبله: بوركينا فاسو دى كنز يا ولاد... امسكوا فيها بايديكم وسنانكم... بنسرق فيها بقالنا سنين وسنين ولسه بتدينا ..

شيرين: هي دي البركة اللي بيقولوا عليها يا بابا
زعبله: أيوه يا بنى.... ربنا يبارك لكم ولعيالكم فيها... ودلوقتى اسمعونى
شيرين: انته علي الهوى يا بابا... اتكلم

زعبله: أنا مش مديون لحد يا ولاد... يعنى أي واحد يصيع عليكم ويقول لكم أبوكم كان مستلف منى فلوس تفوا في وشه علي طول
شيرين: اطمن يا بابا... حرامى علي حرامى ما يلعبش
زعبله: أنا سيبت لكم يا ولاد اللي يكفيكم انتوا وعيالكم وعيال عيالكم ويفيض... فلوس متلتلة متتعدش... مش حقول لكم حافظوا عليها وبس... لالالالالا زودوها كمان وكمان لجل ما روحي ترتاح وأنا في تربتى
هناء: هيا الفلوس اللي انته عملتها يا بابا دي بتسميها فلوس... شفنى أنا وشيرين هنعمل ايه... ولا صحيح حتشوفنا إزاي... عموما ما تقلقش
زعبله: ودلوقتى اسمعوا وصيتى... الحكم لأولادزعبله..... لزم أول ما هناء يحلف اليمين تغيروا اسم بوركينا فاسو وترجعوه زي ما كان زمان أيام الملك شونج هوا
هناء: مفهوم يا بابا... خش في اللي بعده
زعبله: الجيش والشرطة والأزهر... اوعوا واحد من التلاته دول يخرج عن طوعكم أبدا
شيرين: مفهوم برده... اللي بعده... يا ساتر ده انته ملل
زوجته: عيب يا شيرين لما تكلم أبوك كده
شيرين: بهزر يا ماما
زعبله: ودلوقتى نيجى للميه... الساحل الجمالي لشيرين والبحر الأخضر لهناء وقناة السوسيس تخصصوا دخلها صدقة جارية علي روحى
هناء: مفهوم يا بابا... خش في اللي بعده
زوجته: أنته أكيد مخبول... مليار ونص دولار صدقة جارية علي روحك
هناء: ما تاخديش علي كلامه يا ماما... ده يبقي كتير لو طلعنا 100 ولا 200 جنيه علي روحه للفقرا
شيرين وهو يمسك بالألة الحاسبة: ممكن نطلع لحد ألف جنيه... السيولة تسمح
زعبله: أوعوا تفرطوا في حسيب الخادلي من بعدى يا ولاد... حبيب قلبه ميت وأيده طرشه... وهوه ده اللي ينفع مع الغجر اللى هنا
هناء: بس ما بيعجبنيش شنبه يا بابا
زعبله: أنته مالك ومال أم شنبه... احنا بنشترى مجرم
هناء: أعاهدك يا بابا أني هخليه معايا ومش حفرط فيه أبدا
زعبله: الشيخ طهطاوى يا ولاد راجل بركة... يمين يمين شمال شمال... أوعوا تفرطوا فيه... بس ما تخلوهوش يصلي عليا لأني بصراحة مش متأكد إن كان ربنا حيقبل منه ولا لأ

زعبله: عايز جنازتى يا ولاد الناس تحكى وتتحاكى عنها... هاتوا المخرج الإيطالي ده اللي إسمه مكافيللي يصورها
شيرين مبلغ معقول لو خلينا شركة أجنبية تحتكر حق توزيع الفيديو في أوروبا وأمريكا
زعبله: عايز أحلي مدفع يشيل النعش يا ولاد

هناء: مدفع رشاش
زوجته: الهزار مش في الحاجات دى يا هناء
هناء: آسف يا ماما
زعبله: عايز أدفن في شعر الشيخ يا ولاد جنب أولمرت وشارون
شيرين: يعنى بلاش كفر ........

زعبله: لأ كلها براغيت يا شيرين... وإسم شرم الشيخ كمان أشيك بكتير

______________
إنتهت الوصية

[/size][/size]

[/center][/center]